Pranë Autoritetit të Konkurrencës është protokolluar shkresa nr.445 prot., i AK, datë 09.08.2023, “Konfirmim i Depozitimit të Dokumentave”, ku jemi njoftuar mbi transaksionin ndërmjet shoqërive Infinity Investment SHA dhe Eagle Investment SHA.
Referuar dokumentit “Marrëveshje Shitje dhe Blerje”, palët janë:
Pala blerëse: Infinity Investment SHA është një shoqëri aksionare, e themeluar sipas legjislacionit shqiptar, me objekt aktiviteti në fushën e lojërave të fatit përfshirë të gjithë kategoritë, kazino elektronike, këmbim valutor, operim dhe menaxhim i sallave të lojërave të fatit, projektim, menaxhimi, operim, ndërtim i kazinove, import-eksport i makinave të lojërave të fatit, marrje dhe dhënie me qira e tyre etj.
Pala shitëse: Novomatic AG është një shoqëri aksionare, e themeluar sipas legjislacionit të Austrisë dhe një nga prodhuesit dhe eksportuesit më të mëdhenj të pajisjeve të teknologjisë së lartë të lojërave në botë.
Shoqëria Target: Eagle Investment SHA është një shoqëri aksionare, e themeluar sipas legjislacionit shqiptar, me objekt aktiviteti: dhënia me qira e automateve të lojërave të fatit shoqërive të treta të licencuara si dhe dhënia me qira e ambienteve dhe sallave.
Eagle Investment SHA zotërohet plotësisht nga shoqëria Novomatic AG.
Palët në transaksion plotësojnë kriteret e nenit 10 dhe 12 të ligjit nr. 9121, datë 28.07.2003 “Për mbrojtjen e konkurrencës” dhe si rrjedhojë ky transaksion është objekt autorizimi nga Komisioni i Konkurrencës.
Autoriteti fton palët e interesuara, që brenda pesë ditëve nga shpallja e njoftimit, të shprehin opinionet e tyre për transaksionin e njoftuar.
Opinionet mund të dërgohen pranë Autoritetit të Konkurrencës me postë në adresën: Autoriteti i Konkurrencës, Rr. “Sami Frashëri”, Nr. 4, Kati IV Tiranë; apo me e-mail në adresën competition@caa.gov.al.