Pranë Autoritetit të Konkurrencës është protokolluar shkresa nr.553 prot. i AK, datë 29.09.2023 “Njoftim Përqendrimi”, me të cilën jemi njoftuar në lidhje me krijimin e një ndërmarrje të përbashkët / joint – venture, me funksione të plota, nga shoqëritë Ford Motor Company, BMW (US) Holding Corp. dhe American Honda Motor Co., Inc.
Referuar marrëveshjes, palët janë:
Pala 1: Ford Motor Company është një korporatë e themeluar sipas legjislacionit të shtetit të Delaware, shoqëria mëmë fundore e Grupit Ford. Ford Motor Company zhvillon dhe ofron kamionë inovativë Ford, automjete sportive, furgona, makina komerciale dhe automjete luksoze Lincoln, së bashku me shërbimet e lidhura me to.
Ford nuk ka filial , degë apo zyrë përfaqësimi në Shqipëri por realizon xhiro nëpërmjet shitjeve të palëve të treta.
Pala 2: BMW (US) Holding Corp. është një korporatë e themeluar sipas legjislacionit të shtetit të Delaware, pjesë e Grupit BMW.
Grupi BMW është një prodhues mbarëkombëtar i automobilave dhe motocikletave duke përfshirë pjesë këmbimi dhe pajisjet e nevojshme. BMW, Mini, Rolls – Royce Motor Cars dhe BMW Motorrad janë ndër markat më të njohura në botë.
BMW nuk ka filial , degë apo zyrë përfaqësimi në Shqipëri por realizon xhiro nëpërmjet shitjeve të palëve të treta.
Pala 3: American Honda Motor Co., Inc është një korporatë e themeluar sipas legjislacionit të shtetit të Kalifornisë, pjesë e Grupit Honda. Grupi Honda është një prodhues pajisjesh origjinale me bazë në Japoni, e cila prodhon dhe shet automobila, përfshirë automjetet elektrike hibride plug-in dhe automjete elektrike me bateri, motocikleta dhe produkte energjie si dhe aeroplanë.
Honda nuk asnjë filial dhe nuk realizon xhiro në Shqipëri.
Ndërmarrja e Përbashkët (JV), ChargeScape LLC është shoqëria e re që do të krijohet dhe do të jetë aktive në ofrimin e shërbimeve të rrjetit për kompanitë e shërbimeve elektrike dhe operatorët e sistemit, nëpërmjet menaxhimit inteligjent të ngarkesës dhe grumbullimit të të dhënave të energjisë së automjeteve elektrike. Ndërmarrja e përbashkët do të krijohet me synimin që të jetë një sipërmarrje e përbashkët me funksione të plota, dhe të kryejë mbi baza të qëndrueshme të gjitha funksionet e një entiteti ekonomik autonom.
ChargeScape do të jetë funksional vetëm në SHBA dhe Kanada.
Nga shqyrtimi i dokumentacionit, rezulton se transaksioni i njoftuar është në përputhje me nenin 10 dhe 12 të ligjit, sipas të cilit duhet respektivisht të realizohet ndryshimi i qëndrueshëm i kontrollit si dhe të plotësohen kriteret e xhiros.
Për sa më sipër, ky transaksion është objekt autorizimi nga Komisioni i Konkurrencës.
Autoriteti fton palët e interesuara, që brenda pesë ditëve nga shpallja e njoftimit, të shprehin opinionet e tyre për transaksionin e njoftuar.
Opinionet mund të dërgohen pranë Autoritetit të Konkurrencës me postë në adresën: Autoriteti i Konkurrencës, Rr. “Sami Frashëri”, Nr. 4, Kati IV Tiranë; apo me e-mail në adresën competition@caa.gov.al.