Pranë Autoritetit të Konkurrencës është protokolluar shkresa nr. 408 prot., i AK, datë 24.04.2026, “Njoftim Përqendrimi”, ku jemi njoftuar në lidhje me transaksionin e propozuar mbi përftimin e kontrollit të vetëm të shoqërive GARANTI BANK SA dhe MOTORACTIVE IFN SA nga shoqëria RAIFFEISEN BANK SA.
Referuar dokumentacionit të depozituar, palët në transaksion janë:
Blerësi: RAIFFEISEN BANK SA është një shoqëri aksionare, e themeluar sipas legjislacionit rumun, pjesë e Grupit Raiffeisen Bank International.
Grupi RBI ofron shërbime universale bankare dhe financiare përmes disa degëve në Evropën Qëndrore dhe Lindore, si edhe shërbime të tjera financiare në fushën e qirasë, menaxhimit të aseteve etj.
Grupi RBI është prezent dhe realizon të ardhura në Shqipëri përmes RAIFFEISEN BANK SHA.
Shitësit:
Garanti Holding B.V. dhe G Netherlands B.V. janë shoqëri private me përgjegjësi të kufizuar, të themeluara sipas ligjeve të Holandës.
Target :
GARANTI BANK SA është një shoqëri aksionare, e themeluar sipas legjislacionit rumun.
MOTORACTIVE IFN SA është një shoqëri aksionare, e themeluar sipas legjislacionit rumun.
Motoractive Multiservices S.R.L. është një shoqëri me përgjegjësi të kufizuar, e themeluar sipas legjislacionit të Rumanisë, një degë plotësisht në pronësi të MOTORACTIVE IFN SA.
Shoqëritë target nuk janë prezente dhe nuk realizojnë xhiro në Shqipëri.
Nga shqyrtimi i dokumentacionit, rezulton se transaksioni i njoftuar është në përputhje me nenin 10 dhe 12 të ligjit, sipas të cilit duhet respektivisht të realizohet ndryshimi i qëndrueshëm i kontrollit si dhe të plotësohen kriteret e xhiros.
Për sa më sipër, ky transaksion është objekt autorizimi nga Komisioni i Konkurrencës.
Autoriteti fton palët e interesuara, që brenda pesë ditëve nga shpallja e njoftimit, të shprehin opinionet e tyre për transaksionin e njoftuar.
Opinionet mund të dërgohen pranë Autoritetit të Konkurrencës me postë në adresën: Autoriteti i Konkurrencës, Rr. “Sami Frashëri”, Nr. 4, Kati IV Tiranë; apo me e-mail në adresën competition@caa.gov.al.
