Pranë Autoritetit të Konkurrencës është protokolluar shkresa nr.696 prot., i AK, datë 30.07.2025, “Përqendrimi me përftimin e kontrollit të vetëm mbi Energotehnika-Južna Baćka doo Novi Sad dhe ELEKTROMONTAŽA D.O.O. KRALJEVO nga MVM Energetika Zártkörűen Működő Részvénytársaság – Njoftim në përputhje me Ligjin për Mbrojtjen e Konkurrencës”, ku jemi njoftuar në lidhje me transaksionin e propozuar mbi blerjen e aksioneve në shoqëritë Energotehnika-Južna Baćka doo Novi Sad dhe ELEKTROMONTAŽA D.O.O. KRALJEVO nga blerësi MVM Energetika Zártkörűen Működő Részvénytársaság.
Referuar dokumentacionit të depozituar, palët në marrëveshje janë:
Blerësi: MVM Energetika Zártkörűen Működő Részvénytársaság, është një shoqëri me përgjegjësi të kufizuar, e regjistruar sipas legjislacionit të Hungarisë, me objekt aktiviteti: Veprimtari të shoqërive holding, instalimi i makinerive dhe pajisjeve industriale, ndërtimi i objekteve të infrastrukturës për energji elektrike dhe telekomunikacion, etj.
Shitësi: Maneks d.o.o. Novi Sad është një shoqëri me përgjegjësi të kufizuar e themeluar sipas legjislacionit të Serbisë.
Target 1: Energotehnika-Južna Baćka doo Novi Sad është një shoqëri me përgjegjësi të kufizuar, e themeluar sipas legjislacionit të Serbisë, me objekt aktiviteti: Ndërtim i linjave elektrike dhe të telekomunikacionit. Shoqëria ofron shërbime ndërtimi dhe mirëmbajtje për objekte energjetike në të gjitha nivelet e tensionit, si dhe shërbime të prodhimit të energjisë dhe pajisjeve për klientë vendas dhe ndërkombëtarë duke përfshirë aktivitete si: menaxhimi i projekteve dhe zbatimi i tyre, hartimi i projekteve dhe përgatitja e dokumentacionit teknik të plotë, logjistika e pajisjeve, aktivitete mirëmbajtje në fushën e energjisë elektrike dhe termike, etj.
Target 2: ELEKTROMONTAŽA D.O.O. KRALJEVO është një shoqëri me përgjegjësi të kufizuar, e themeluar sipas legjislacionit të Serbisë, me objekt aktiviteti: Ndërtim i linjave elektrike dhe të telekomunikacionit. Shoqëria ofron një gamë të gjerë shërbimesh në fushën e ndërtimit dhe mirëmbajtjes së objekteve energjetike në të gjitha nivelet e tensionit, si dhe shërbime të prodhimit të energjisë dhe pajisjeve për klientë vendas dhe ndërkombëtarë, etj.
Shoqëritë target nuk kanë asnjë filial, degë apo zyrë përfaqësimi në Republikën e Shqipërisë.
Nga shqyrtimi i dokumentacionit, rezulton se transaksioni i njoftuar është në përputhje me nenin 10 dhe 12 të ligjit, sipas të cilit duhet respektivisht të realizohet ndryshimi i qëndrueshëm i kontrollit si dhe të plotësohen kriteret e xhiros.
Për sa më sipër, ky transaksion është objekt autorizimi nga Komisioni i Konkurrencës.
Autoriteti fton palët e interesuara, që brenda pesë ditëve nga shpallja e njoftimit, të shprehin opinionet e tyre për transaksionin e njoftuar.
Opinionet mund të dërgohen pranë Autoritetit të Konkurrencës me postë në adresën: Autoriteti i Konkurrencës, Rr. “Sami Frashëri”, Nr. 4, Kati IV Tiranë; apo me e-mail në adresën competition@caa.gov.al.
