Me shkresën nr. 457, datë 23.08.2023 “Njoftim përqendrimi dhe kërkesë për autorizim të përqendrimit”, jemi njoftuar mbi përftimin e kontrollit të Fermave Gjermane dhe Fermave Franceze nga shoqëritë Statkraft Germany GmbH, Statkraft Holding Wind & Solar Deutschland GmbH dhe Statkraft Renouvelables Sasu.
Referuar dokumentit “Marrëveshje Shitblerje”, palët pjesëmarrëse në transaksion janë:
Pala blerëse:
Blerësi 1: Statkraft Germany GmbH është një shoqëri me përgjegjësi të kufizuar, e themeluar sipas legjislacionit gjerman, me objekt aktiviteti: blerja, veprimtaria holding, administrimi dhe shitja e aksioneve në shoqëri të tjera dhe kryerja e të gjitha aktiviteteve të ndërlidhura me to.
Blerësi 2: Statkraft Holding Wind & Solar Deutschland GmbH është një shoqëri me përgjegjësi të kufizuar, e themeluar sipas legjislacionit gjerman, me objekt aktiviteti: blerja, shitja dhe administrimi i aksioneve të shoqërisë.
Blerësi 3: Statkraft Renouvelables Sasu është një shoqëri aksionare e thjeshtuar, e themeluar sipas legjislacionit francez, me objekt aktiviteti projektimin, ndërtimin dhe shfrytëzimin e centraleve të energjisë elektrike, marrjen e angazhimeve financiare ose materialeve në tregtimin e energjisë dhe çdo aktivitet tjetër që lidhet me to etj,
Blerësit janë pjesë e Grupit Statkraft. Grupi Statkraft është prezent në Shqipëri përmes dy filialeve të saj, Statkraft Renewables Albania SHPK dhe Devolli Hydropower SHA, të cilët operojnë në tregun e prodhimit të energjisë elektrike.
Pala shitëse:
Shitësi 1: Breeze Two Energy GmbH & Co.KG është një partneritet i kufizuar, i themeluar sipas legjislacionit gjerman.
Shitësi 2: Breeze Two GmbH është një shoqëri me përgjegjësi të kufizuar, e themeluar sipas legjislacionit gjerman, me objekt aktiviteti: menaxhimin e aseteve nën zotërim.
Shoqëritë Target:
Target 1: Statkraft Windenergie GmbH & Co.KG është një partneritet i kufizuar, i themeluar sipas legjislacionit gjerman.
Target 2: Eoliennes Suroit SNC (Shoqëria e Projektit Francez) është një partneritet, i themeluar sipas legjislacionit francez.
Shoqëritë target nuk janë prezente dhe nuk gjenerojnë të ardhura në Shqipëri.
Nga shqyrtimi i dokumentacionit, rezulton se transaksioni i njoftuar është në përputhje me nenin 10 dhe 12 të ligjit, sipas të cilit duhet respektivisht të realizohet ndryshimi i qëndrueshëm i kontrollit si dhe të plotësohen kriteret e xhiros.
Për sa më sipër, ky transaksion është objekt autorizimi nga Komisioni i Konkurrencës.
Autoriteti fton palët e interesuara, që brenda pesë ditëve nga shpallja e njoftimit, të shprehin opinionet e tyre për transaksionin e njoftuar.
Opinionet mund të dërgohen pranë Autoritetit të Konkurrencës me postë në adresën: Autoriteti i Konkurrencës, Rr. “Sami Frashëri”, Nr. 4, Kati IV Tiranë; apo me e-mail në adresën competition@caa.gov.al.
Shkarko Njoftimin