Pranë Autoritetit të Konkurrencës është protokolluar shkresa nr. 553 prot. i AK, datë 22.08.2024 “Njoftim Përqendrimi”, me të cilën jemi njoftuar në lidhje me transaksionin e përftimit të kontrollit të shoqërisë JOHNSON CONTROLS – HITACCHI AIR CONDITIONING HOLDING (UK) LTD dhe biznesit të shoqërisë JOHNSON CONTROLS INTERNATIONAL PLC nga shoqëria Robert Bosch GmbH.
Referuar dokumenteve të depozituara, palët në transaksion janë:
Pala blerëse: Robert Bosch GmbH është një shoqëri me përgjegjësi të kufizuar, e themeluar sipas legjislacionit gjerman, pjesë e Bosch Group.
Bosch Group është një furnizues global i teknologjisë dhe shërbimeve për industrinë e automobilave, teknologjinë industriale, mallrat e konsumit dhe energjinë dhe industrinë e teknologjisë së ndërtimit.
Bosch nuk ka filiale, por realizon xhiro në Shqipëri nëpërmjet palëve të treta.
Pala shitëse:
Shitësi 1: JOHNSON CONTROLS INTERNATIONAL PLC (JCI) është një shoqëri e kufizuar publike, e themeluar sipas legjislacionit të Irlandës, e cila prodhon produkte dhe sisteme ndërtimi, duke përfshirë pajisjet HVAC rezidenciale dhe komerciale, sistemet industriale të ftohjes, kontrollet, sistemet e sigurisë, sistemet e zbulimit të zjarrit dhe zgjidhjet e shuarjes së zjarrit.
Shitësi 2: Hitachi Global Life Solutions, Inc. është një shoqëri aksionare, e themeluar sipas ligjeve të Japonisë, me objekt aktiviteti prodhimin dhe shpërndarjen e pajisjeve shtëpiake.
Hitachi Global Life Solutions, Inc. zotëron plotësisht filialin e tij, HITACHI – JOHNSON CONTROLS AIR CONDITIONING .
Target:
- JOHNSON CONTROLS – HITACCHI AIR CONDITIONING HOLDING (UK) LTD (JCH) është një shoqëri me përgjegjësi të kufizuar, e themeluar sipas legjislacionit të Mbretërisë së Bashkuar.
JOHNSON CONTROLS – HITACHI AIR CONDITIONING HOLDING (UK) LTD (JCH) operon një biznes të ngrohjes, ventilimit dhe ajrit të kondicionuar pa kanalizime në njësi banimi dhe njësi të vogla tregtare.
- Biznesi i ngrohjes, ventilimit dhe ajrit të kondicionuar (HVAC) me kanalizime në njësi banimi dhe njësi të vogla tregtare i shoqërisë JOHNSON CONTROLS INTERNATIONAL PLC (JCI).
Biznesi i JCI-së për HVAC me kanale përfshin produktet si: sistemet e ngrohjes dhe ftohjes rezidenciale me kanale; sistemet e ngrohjes dhe ftohjes tregtare; pajisje për cilësinë e ajrit të brendshëm.
Nga shqyrtimi i dokumentacionit, rezulton se transaksioni i njoftuar është në përputhje me nenin 10 dhe 12 të ligjit, sipas të cilit duhet respektivisht të realizohet ndryshimi i qëndrueshëm i kontrollit si dhe të plotësohen kriteret e xhiros.
Për sa më sipër, ky transaksion është objekt autorizimi nga Komisioni i Konkurrencës.
Autoriteti fton palët e interesuara, që brenda pesë ditëve nga shpallja e njoftimit, të shprehin opinionet e tyre për transaksionin e njoftuar.
Opinionet mund të dërgohen pranë Autoritetit të Konkurrencës me postë në adresën: Autoriteti i Konkurrencës, Rr. “Sami Frashëri”, Nr. 4, Kati IV Tiranë; apo me e-mail në adresën competition@caa.gov.al.
