Pranë Autoritetit të Konkurrencës është protokolluar shkresa nr. 497 prot., i AK, datë 21.05.2026, “Njoftim përqendrimi”, ku jemi njoftuar në lidhje me transaksionin e propozuar të përftimit të kontrollit të përbashkët të shoqërisë MAK Mecsek Autópálya Koncessziós Zártkörűen Működő Részvénytársaság nga shoqëritë STRABAG AG dhe Aberdeen Infrastructure (Holdco) V-A B.V.
Referuar dokumentacionit të depozituar, palët në transaksion janë:
Blerësi:
STRABAG AG është një shoqëri aksionare, e themeluar sipas legjislacionit të Austrisë, me objekt aktiviteti: ndërtimi industrial, ndërtimi i rrugëve dhe tuneleve, ndërtimi i urave, hidrocentraleve dhe veprave të tjera inxhinierike civile, ndërtim rezidencash dhe banesash, si dhe zhvillimi i pasurive të paluajtshmne dhe realizimi i projekteve të biznesit.
STRABAG AG është pjesë e Grupit Strabag, i cili është prezent në Shqipëri nëpërmjet Degës së shoqërisë së huaj “STRABAG AG” dhe STRABAG SHPK.
Aberdeen Infrastructure (Holdco) V-A.B.V është një shoqëri private me përgjegjësi të kufizuar, e themeluar sipas legjislacionit të Holandës, me objekt aktivitet i shoqërive holding.
Aberdeen Infrastructure (Holdco) V-A.B.V është pjesë e Aberdeen Group, një grup ndërkombëtar i shërbimeve financiare dhe menaxhimit të aseteve.
Aberdeen Group nuk është prezent dhe nuk gjeneron të ardhura në Shqipëri.
Shitësi: COLAS S.A. është një shoqëri anonime franceze, e themeluar dhe që operon sipas ligjeve të Francës.
Shoqëria target: MAK Mecsek Autópálya Koncessziós Zártkörűen Működő Részvénytársaság është një shoqëri koncesionare për qëllime të veçanta, e themeluar sipas legjislacionit të Hungarisë. Aktivitetet e saj kufizohen në menaxhimin e zonës së saj të koncesionit në Hungari.
Target nuk ka filiale dhe nuk ka realizuar xhiro në Shqipëri.
Nga shqyrtimi i dokumentacionit, rezulton se transaksioni i njoftuar është në përputhje me nenin 10 dhe 12 të ligjit, sipas të cilit duhet respektivisht të realizohet ndryshimi i qëndrueshëm i kontrollit si dhe të plotësohen kriteret e xhiros.
Për sa më sipër, ky transaksion është objekt autorizimi nga Komisioni i Konkurrencës.
Autoriteti fton palët e interesuara, që brenda pesë ditëve nga shpallja e njoftimit, të shprehin opinionet e tyre për transaksionin e njoftuar.
Opinionet mund të dërgohen pranë Autoritetit të Konkurrencës me postë në adresën: Autoriteti i Konkurrencës, Rr. “Sami Frashëri”, Nr. 4, Kati IV Tiranë; apo me e-mail në adresën competition@caa.gov.al.
