Në kuadër të Ditës së Konkurrencës, në datën 5 dhjetor 2025, Autoriteti i Konkurrencës, në bashkëpunim me Fakultetin e Drejtësisë, Universiteti i Tiranës, si dhe me Fakultetin e Ekonomisë të Universitetit të Tiranës, Fakultetin e Drejtësisë të Kolegjit Universitar Qirjazi, Fakultetin e Drejtësisë të Universitetit Epoka, Fakultetin e Drejtësisë të Universitetit Mesdhetar dhe Universitetin Europian të Tiranës, organizoi ceremoninë e ndarjes së çmimeve për konkursin e eseve kushtuar temave kyçe të së drejtës së konkurrencës.
Ky aktivitet u zhvillua në ambientet e Fakultetit të Drejtësisë dhe synoi të nxisë kulturën e konkurrencës tek brezi i ri, duke i afruar studentët me konceptet moderne të ligjit dhe politikave konkurruese.
Autoriteti i Konkurrencës falënderon për bashkëpunimin dhe kontributin e tyre veçanërisht pedagogët: Dr. Gentjan Skara (Universiteti Epoka), Dr. Fjoralba Caka (FDUT – UT), Dr. Luljeta Kodra (Universiteti Mesdhetar), Prof. Assoc. Dr. Arjan Tushaj (Fakulteti i Ekonomisë – UT), Prof. Assoc. Dr. Erjola Aliaj (UET) dhe Prof. Assoc. Dr. Enida Bozheku (Dekane e Fakultetit të Drejtësisë, Kolegji Universitar Qirjazi).
Ceremonia u çel me fjalën përshëndetëse të Prof. Dr. Dorina Hoxha, Dekane e Fakultetit të Drejtësisë, e cila vlerësoi bashkëpunimin institucional dhe rëndësinë e zhvillimit akademik të studentëve në fushën e konkurrencës.
Në vijim, z. Denar Biba, Kryetar i Autoritetit të Konkurrencës, mbajti për studentët e pranishëm një leksion përmes të cilit solli reflektime praktike mbi zhvillimet bashkëkohore të politikave të konkurrencës në Shqipëri dhe BE, duke u ndalur te sfidat e tregjeve dinamike dhe rëndësia e ruajtjes së konkurrencës së ndershme.
Pika kulmore e ceremonisë ishte ndarja e çmimeve për studentët fitues, autorë të eseve më të mira, të cilët u vlerësuan me çertifikata mirënjohjeje për angazhimin, analizën kritike dhe kreativitetin e treguar.
Aktiviteti u mbyll në një atmosferë motivuese, duke riafirmuar angazhimin e Autoritetit të Konkurrencës për të promovuar edukimin dhe ndërgjegjësimin e të rinjve në fushën e konkurrencës, si një shtyllë thelbësore për zhvillimin e një ekonomie të hapur dhe funksionale.
