Mbi takimin e 12-të të Nënkomitetit “Për tregun e brendshëm dhe konkurrencën,
përfshirë Mbrojtjen e Konsumatorit dhe Shëndetit”
Sot më datë 27 Maj 2021 u zhvillua virtualisht takimi i 12-të i Nënkomitetit BE-Shqipëri “Për tregun e brendshëm dhe konkurrencën, përfshirë mbrojtjen e konsumatorit dhe shëndetit”, i cili është një proces i përvitshëm raportimi dhe diskutimi midis Autoritetit të Konkurrencës dhe përfaqësuesit të Drejtorisë së Përgjithshme të Konkurrencës së Komisionit Evropian.
Autoriteti i Konkurrencës u vlerësua me nota tejet pozitive dhe u përgëzua për arritje në fushën e konkurrencës duke theksuar:
• nismat e ndërmarra për mbrojtjen e konkurrencës së lirë dhe efektive në treg në drejtim të tregjeve të hetuara si tregje me impakt të drejtpërdrejtë në konsumatorin shqiptar,
• plotësimin e procesit të përafrimit të legjislacionit sekondar të konkurrencës me Aquisin e Bashkimit Evropian, i cili është përmbushur në masën 100%, në kuadër të Planit Kombëtar për Integrimin Evropian, PKIE 2021-2023,
• rritjen dhe forcimin e kapaciteteve administrative dhe institucionale të Autoritetit të Konkurrencës nëpërmjet rritjes së numrit të punonjësve si dhe trajnimit të stafit të ri e atij ekzistues.