Autoriteti i Konkurrencës i Shqipërisë po merr pjesë në workshopin dyditor “Forcimi i kapaciteteve për zbatimin efektiv të ligjit të konkurrencës”, i zhvilluar në Podgoricë, në kuadër të programit të asistencës teknike të Bashkimit Europian TAIEX.
Aktiviteti u organizua në bashkëpunim me Agjencinë për Mbrojtjen e Konkurrencës të Malit të Zi, me mbështetjen e Zyrës për Mbrojtjen e Konkurrencës dhe Konsumatorit të Republikës së Polonisë (UOKiK) dhe të Komisionit Europian.
Gjatë workshopit, ekspertë të UOKiK ndanë përvoja praktike mbi hetimet konkurruese dhe zbatimin e neneve 101 dhe 102 të Traktatit për Funksionimin e Bashkimit Europian (TFBE).
Temat kryesore të trajtuara përfshinë:
- Abuzimin me pozitën dominuese;
- Marrëveshjet e ndaluara “by object” dhe “by effects”;
- Ndihmën shtetërore dhe skemat e saj;
- Bashkëpunimin me gjykatat;
- Direktivën për praktikat e padrejta tregtare (UTP Directive);
- Kontrollin e përqendrimeve (Mergers & Acquisitions – M&A).
Ky workshop kontribuon në rritjen e kapaciteteve të institucioneve shqiptare dhe malazeze në kuadër të Kapitullit 8 – Politika e Konkurrencës, si dhe në forcimin e bashkëpunimit rajonal për zbatim më efektiv të ligjit të konkurrencës dhe përafrim me standardet e Bashkimit Europian.
