Në kuadër të “Memorandumit të Mirëkuptimit” midis Autoritetit Shqiptar të Konkurrencës dhe Autoritetit Maltez të Konkurrencës dhe të Çështjeve të Konsumatorit, në datat 26 – 27 Shtator, përfaqësues të Autoritetit të Konkurrencës zhvilluan një vizitë ne Maltë, ku në datën 26 Shtator u pritën nga Kryetarja e Autoritetit Maltez të Konkurrencës dhe Cështjeve të Konsumatorit, Ing. Helga Pizzuto.
Në takimin me Drejtorinë e Konkurrencës, përfaqësuesit e Autoritetetit Shqiptar të Konkurrencës u njohën nga afër me eksperiencën e një vendi anëtar të BE në lidhje me zbatimin e ligjit të konkurrencës, bashkëpunimin midis vendeve anëtare në kuadër të Rrjetit Evropian të Konkurrencës (ECN), harmonizimin e legjislacionit kombëtar me legjislacionin evropian, dhe veçanërisht me Direktivën ECN+.
Më 27 Shtator përfaqësuesit e Autoritetit Shqiptar të Konkurrencës u pritën nga SH.T.Z. Deo Debattista, Sekretar Shteti përgjegjës për Konkurrencën dhe Mbrojtjen e Konsumatorit, dhe nga SH.T.Z. Edward Zammit Lewis, Ministër për Marrëdhëniet me Evropën dhe Barazinë, të cilët shprehën mbështetje për Shqipërinë lidhur me integrimin në BE si dhe me çështjet e bashkëpunimit në fushën e zbatimit të ligjit të konkurrencës.
Kryetarja e Autoritetit të Konkurrencës, Znj. Juliana Latifi, shprehu mirënjohjen e saj për angazhimin e qeverisë së Maltës në mbështetje të proçeseve integruese në Shqipëri, dhe posaçërisht të procesit të hapjes së negociatave për Shqipërinë.