Autoriteti i Konkurrencës vlerëson rolin e medias në informimin e publikut dhe kontribuon gjithmonë me transparencë në çështjet që lidhen me funksionimin e tregjeve dhe mbrojtjen e konkurrencës së ndershme. Në vijim të disa publikimeve të fundit mbi vendimet e Komisionit të Konkurrencës në tregun e grumbullimit të frutave dhe perimeve, dëshirojmë të saktësojmë disa elementë të rëndësishëm të faktit dhe të procedurës.
- Objekti i hetimit të thelluar përfunduar më 26.11.2025
Komisioni i Konkurrencës, në mbledhjen e datës 26.11.2025, miratoi vendimet nr. 1234–1239, me të cilat konstatoi se një grup ndërmarrjesh grumbulluese – Omer Fruit SHPK, Nedrete Arapi PF, Besim Thaqi PF, Morina Grup SHPK, Fruit-To-Zela SHPK dhe Roland-2012 SHPK – kishin bashkërenduar sjelljen gjatë periudhave të sezonit, duke diktuar çmimet në dëm të fermerëve prodhues dhe duke aplikuar marzh fitimi (mark-up) të lartë, deri në 115%.
Objekt i këtij hetimi, i nxitur kryesisht nga ankimet e fermerëve lokalë, ishte “grumbullimi dhe shitja me shumicë e fruta perimeve” dhe subjekte të këtij hetimi rrjedhimisht ishin ndërmarrjet që ushtronin veprimtari grumbulluese dhe shitëse.
- Pse ndërmarrja EKMA Albania SHPK nuk ishte subjekt i këtij hetimi
Ndërmarrja EKMA Albania SHPK nuk ushtron aktivitet grumbullimi të produkteve bujqësore, por operon në tregun e qiradhënies së ambienteve për magazinimin dhe tregtimin e produkteve agro-ushqimore në Tiranë. Për këtë arsye, subjekti nuk bën pjesë në tregun përkatës që ishte objekt i hetimit të përfunduar në nëntor 2025.
Megjithatë, kjo nuk e ka penguar Autoritetin e Konkurrencës që, në të shkuarën, të ndërmarrë veprimet e nevojshme ligjore ndaj çdo subjekti, përfshirë EKMA Albania SHPK, sa herë që janë konstatuar shkelje në tregun ku ky subjekt operon. Nuk e pengon as për hapjen e një hetmi të ri, në të ardhmen.
- Mbi vjelen e gjobës ndaj EKMA Albania SHPK
Në lidhje me pretendimin per ekzekutimin e vetëm një pjese të vogël të gjobës së vendosur ndaj EKMA Albania sh.p.k., për korrektesë dhe transparencë, sqarojmë sa vijon:
– Me Vendimin nr.572, datë 22.11.2018, Komisioni i Konkurrencës vendosi gjobë ndaj EKMA Albania SHPK për abuzim me pozitën dominuese në tregun e qiradhënies së ambienteve për magazinimin dhe tregtimin e produkteve agro-ushqimore në Tiranë.
- Vlera e gjobës ishte 43,168,617 lekë dhe është ekzekutuar 100% duke kaluar në favor të buxhetit të shtetit.
Ky element është i rëndësishëm për të theksuar se zbatimi i vendimeve të Autoritetit të Konkurrencës është i plotë dhe nuk ka asnjë rast të papërmbyllur nga ana e institucioneve përgjegjëse.
Autoriteti i Konkurrencës mbetet i angazhuar të garantojë konkurrencë të ndershme dhe funksionimin efikas të tregjeve.
