Autoriteti i Konkurrencës, në bashkëpunim me UNCTAD dhe Bankën Europiane për Rindërtim dhe Zhvillim (EBRD), çeli sot në Tiranë aktivitetin ndërkombëtar “Competition Compliance – Launching the Competition Compliance Manuals”, një iniciativë e rëndësishme që synon forcimin e kulturës së përputhshmërisë me ligjin e konkurrencës në Shqipëri.
Në hapje të aktivitetit, Ministrja e Ekonomisë dhe Inovacionit, znj. Delina Ibrahimaj, theksoi rëndësinë e rritjes së ndërgjegjësimit dhe përgjegjësisë së bizneseve në respektimin e rregullave të konkurrencës, duke nënvizuar se përputhshmëria është një element thelbësor për funksionimin e një tregu të lirë, të ndershëm dhe konkurrues.
Gjithashtu, Kryetari i Autoritetit të Konkurrencës, z. Denar Biba, në fjalën e tij përshëndetëse, vuri në dukje se prezantimi i manualeve të përputhshmërisë përbën një hap të rëndësishëm drejt rritjes së transparencës, parandalimit të praktikave të padrejta dhe forcimit të integritetit të tregut, duke kontribuar drejtpërdrejt në përgatitjen e Shqipërisë për procesin e integrimit në Bashkimin Europian.
Gjatë sesionit të parë u prezantuan për herë të parë Manualet e Përputhshmërisë së Konkurrencës, dokumente praktike të hartuara me mbështetjen e partnerëve ndërkombëtarë, të cilat synojnë t’i ofrojnë bizneseve udhëzime konkrete për identifikimin, parandalimin dhe menaxhimin e rreziqeve të shkeljeve të mundshme të ligjit të konkurrencës.
Pjesëmarrës nga institucione publike, komuniteti i biznesit, organizatat ndërkombëtare dhe ekspertë të fushës diskutuan mbi rëndësinë e forcimit të përputhshmërisë, përfitimet që sjell për tregun dhe konsumatorët, si dhe përgjegjësitë e reja që u shtohen ndërmarrjeve në kuadër të përafrimit me standardet europiane.
Aktiviteti vijon punimet me sesione të dedikuara për ndërmarrjet, institucionet dhe profesionistët e fushës, si dhe me prezantime nga ekspertë ndërkombëtarë të përputhshmërisë së konkurrencës.
