Komisioni i Konkurrencës zgjat afatin e hetimit paraprak ndaj ndërmarrjeve Vodafone Albania SHA dhe One Albania SHA në tregun me pakicë të shërbimeve celulare
Komisioni i Konkurrencës, në mbledhjen e datës 25 Korrik 2025, vendosi të ndryshojë Vendimin nr. 1156, datë 29.01.2025, që ka të bëjë me hapjen e hetimit paraprak ndaj ndërmarrjeve Vodafone Albania SHA dhe One Albania SHA në tregun me pakicë të shërbimeve celulare.
Ky vendim vjen si rezultat i nevojës për një analizë më të plotë të sjelljes së ndërmarrjeve të cilat operojnë në tregun me pakicë të shërbimeve celulare si dhe sigurimi për një vendimarrje objektive nga ana e Komisionit të Konkurrencës.
Për këtë arsye, me Vendimin nr. 1201, datë 25.07.2025, Komisioni vendosi të ndryshohen pikat II dhe III, në VKK nr. 1156, datë 29.01.2025 “Për hapjen e procedurës së hetimit parapak ndaj ndërmarrjeve Vodafone Albania SHA dhe One Albania SHA në tregun me pakicë të shërbimeve celulare”, si vijon:
II. “Hetimi paraprak të përfshijë periudhën kohore nga 01.01.2022 deri në 25.07.2025”.
III. “Raporti i hetimit paraprak duhet të paraqitet në Komisionin e Konkurrencës jo më vonë se data 29 Tetor 2025”.
Për më shumë informacion, ju ftojmë të vizitoni faqen zyrtare të Autoritetit të Konkurrencës: www.caa.gov.al.
